中學生放兩天風假仍然要做家課,阿仔家課夠應景,寫防風對策。嘿,最乾手淨腳就是預早入住酒店,訂遠離海濱的六星級套房,包無停水停電煩惱。如要遷就家長上班,訂近辦公室位置,東鐵停幾多個鐘都唔憂。不過呢,手停口停與大部份「樓未供完」的打工仔,冇可能咁好景,極端天氣愈來愈頻的今天,趁山竹淫威的恐懼未丟淡,諗吓自保應變的裝置,有冇這些:
一,床頭安全帶。安裝在窗玻璃唔知幾時盡爆的主人房床邊,確保不會連人帶枕被扯落街。(想殺妻者,記得趁十號波高掛時,在安全帶做手腳)
二,窗口冷氣機護罩。想像冷氣機是美式足球員,忽然畀佢從外邊飛撞埋身還得了?加護罩圍欄甚至用狗鏈固定鎖好。(將寵物狗棄於天台或露台食風的主人,試用狗鏈鎖住自己一晚,超爽的。)
三,MI6西裝。大台記者在杏花邨直擊強風,已經變成颱風真人騷。穿黃色雨褸唔夠型,靚佬湯招牌西裝才襯得起這些不倒特工。
四,黐M巾。黐玻璃的膠紙被炒至五六十蚊一卷,效果遠遜吸水防漏的M巾!記得黐十字,替教會爭戰,榮耀神。