身兼行會成員嘅資深大律師湯家驊（圖），前日喺facebook撰文滲出濃濃葡萄味，皆因佢自揭同律政司前司長袁國強多番就法治等議題投稿去《紐約時報》但食白果，反而《紐時》登咗青年新政游蕙禎撐港獨嘅文章，仲話覺得嗰份係令人奇怪嘅報章。
《紐時》：已刊登兩邊意見
到底事實係咪咁？八方向《紐時》查詢，發言人話佢哋就住香港民主發展嘅議題，早於去年已經刊登咗行政會議成員兼立法會議員葉劉淑儀嘅文章，題為「Hong Kong's Democracy Dreams」，發言人話該報論壇版目的，係邀請持不同意見兼了解情況嘅人士進行理性討論，「我們已就此議題（香港民主）刊登兩邊意見，包括去年這一篇（葉劉淑儀的文章）」，咁湯狀仲有冇機會喺《紐時》表達意見先？答案係有嘅，發言人話，編輯好歡迎袁國強同湯家驊回應，仲向八方提供咗有關投稿嘅超連結，呢個連結就係畀「一般讀者」投稿「給編輯的信」嘅途徑，不過要求投稿者以150至175字為限囉。