前日星島集團主席何柱國怒轟土地供應小組係廢柴，特首林鄭月娥即場還拖，力撐土地供應專責小組諮詢做咗好多嘢。炒何唔係娥特班子嘅人，佢踩娥特個場仲可以理解，之但係連娥特嘅行政會議成員、新民黨主席葉劉淑儀都踩埋個諮詢一份，仲搞到怒撕諮詢問卷，咁又唔係咁講。
新民黨噚日開記者會，回應土地供應專責小組公眾參與活動意見書。其實新民黨有提好多建議，好似喺內地水域嘅桂山島進行大規模填海、發展屯門公路轉乘站及毗鄰用地、重新研究興建超級監獄、藍塘填海方案等。
不過葉劉淑儀就話，佢哋曾經約土地供應專責小組主席黃遠輝同新民黨溝通，但佢好唔滿意小組徵求意見嘅「點心紙」式問卷，批評收集資料唔夠全面、太武斷、資料過度簡化，佢仲話覺得剔點心紙冇乜意義，之後即場話「所以我撕爛佢」，隨即當住傳媒面前，撕爛小組嘅問卷「點心紙」。
其實撕爛政府諮詢文件呢類嘢民主派成日做，不過作為行會成員、林鄭管治班子一部份，要搞到撕文件咁激去表達不滿，又真係比較少見，唔通葉劉又同民主派一樣，冇乜渠道向娥特反映不滿？
「黨友」黎棟國唔覺好激
上月底先加入新民黨，噚日首次以「常務副主席」身份現身記招的保安局前局長黎棟國，佢喺記招上亦有大談土地政策，但佢同八方講自己任內根本無涉獵土地政策，不過有事先做足功課，又讚新民黨資料搜集都好豐富，八方問佢覺唔覺葉劉撕爛「點心紙」式問卷「過激」，黎棟國話唔多覺，仲話撕得好慢啫！唔係好激吖。
李八方