再有高官車輛違反交通規則，當場俾市民影到斷正！今次輪到掛有「AM 4」車牌嘅教育局局長座駕喺雙白線U-Turn掉頭，罔顧行車安全！
市民王先生喺周三晚揸車途經灣仔莊士敦道，向銅鑼灣方向行駛，當去到莊士敦道近譚臣道時，前面一部私家車行行吓突然喺雙白線U-Turn。當時王先生好彩無跟車太貼免生意外，但佢望清楚對方車牌竟然係AM 4，即係教育局局長楊潤雄嘅座駕，就覺得好離譜囉！
王先生嘅車Cam拍低咗事發經過，當時係周三晚7點13分，王先生話見到部AM 4打橫霸咗對面線，仲要褪尾先掉到頭，完全係唔依交通規則亂咁嚟。事後王先生好勞氣咁同《蘋果》講，佢話雖然當時睇唔清楚楊局長喺唔喺車上，但就質疑點解政府高官可以知法犯法呢？而對方從事教育嘅，咁點樣為莘莘學子樹立榜樣呢？
聲稱事發時不在車上
教育局局長新聞秘書回應有關片段，承認當晚係有咁嘅事發生，但就話局長當時唔喺車上，對事件並唔知情。教育局正根據既定程序展開調查，會採取適當行動，仲話道路安全十分重要，局方對有關事件表示歉意。
其實過去都有其他高官座駕試過違反交通規則，好似人稱「波叔」嘅財政司司長陳茂波咁，佢部掛有「FS」車牌嘅專屬座駕，喺舊年3月就俾網民發現違法停泊喺影線範圍內。又好似政務司司長張建宗咁，佢喺2013年12月仲係勞工及福利局局長嘅時候，佢部「AM 38」座駕就曾經喺佐敦近港鐵柯士甸站對開切雙白線，一樣俾人發現。所以話呢，若要人不知，除非己莫為，市民嘅眼睛係雪亮嘅。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。