今次颱風山竹襲港後，外界係咁鬧政府災後冇叫全港停工、負責交通嘅運房局長陳帆又匿埋唔出嚟交代交通大混亂，李卓人噚日係社交網出po，話娥特叫保安局檢討處理緊急事故機制、公務員事務局就檢討公務員風暴後嘅上班安排指引，咁打工仔上班安排又點呢？有冇叫勞福局檢討？由於勞福局局長羅致光同陳帆一樣唔見咗人，於是李卓人就索性出po尋人，睇吓呢位失蹤局長去咗邊。
政府無意立法
唔知羅致光係咪聽到阿人呼喚，噚日即刻出嚟噏幾句。佢話明白打工仔喺風暴後無法準時上班，擔心畀僱主責怪會有好大壓力，但堅持唔適合就災後停工定立劃一機制喎，又話好多嘢唔係政府一聲令下就可以解決，之後繼續用娥特說法，叫僱主自己定風災復工指引，換句說話講，羅致光即係同打工仔講，唔好望政府會搞災後可以宣佈停工嘅法例喇！