打風之後，幾個午飯約會改期，皆因一啲老友話公司忙於清理寫字樓爆窗，一啲又因風雨取消歸期，滯留在外，理由不一而足，總之大家係明白人，有緣再相會啦吓。
V先生就好嘢噃，佢嘅助手話一早卜咗龍景軒，呢間餐廳每日滿座，一改日子就要有排先至卜到位，故此V先生話即使打風後有不少事情要趕住做，食飯之期不改。於是大家齊集龍景軒，問佢嘅物業地盤與遊艇有冇損壞，哈，好嘢噃，佢話全部頂得住，乜事都冇，偏偏就係9月17日不少夥計返工需時，返到公司大都軟弱疲勞，欠缺生產力，假如公司停工一天，相信亦無多大生產力損失，好似佢嘅秘書咁，自馬鞍山出發，困在大圍火車站內五小時，中午十二時後回到中環公司，已經面青腳軟，邊度忍心叫佢做多啲嘢噃。佢自己住在南區X灣，不敢揸車返中環，去到海洋公園站乘地鐵，多人擠迫到動彈不得，放工時亦然，白白辛苦一日。
幾位老友齊聲嘆息話特區政府離地，9月16日晚上收齊各方交通滙報之後，竟然會以為星期一可正常恢復工作，實在輕率。一啲保皇黨發表社論話星期一停工係民粹，又有網上散播「香港人應該感恩」之言論，當然有佢哋嘅自由，保皇黨建制派呢個時候唔為林鄭講好話，等幾時先至講噃，偏偏鄧家彪陳克勤都發表文章批評政府，唔通保皇黨內鬥？
星期一（917）如果文職公僕等人停工一天，只有緊急維修清理樹木人員上班嘅話（最好同時畀佢地雙工以示獎勵），大部份打工仔留在家裏，對道路鐵路需求壓力大減，清理人員一日之內就可以在主要路線及鐵路線清除障礙完畢，大家就唔駛在星期一湧出街返工，齊齊動彈不得啦。其實香港人真係好，人人守秩序，冇騷亂，冇嚎哭，係當今世界，中國人行為典範，林鄭其實要感恩，唔係叫人搵佢出氣！當日沙田係重災區，晚上一位朋友由大圍揸車返馬鞍山，用咗3小時，整日香港人浪費在路上之工時，數以千萬計（二百萬每人乘五小時已經係一千萬小時），加上汽油損失，汽車困在路上排放污染，加埋精神損失，體力消耗導致之生產力消失，加加埋埋已近幾十億元，還不計因此而產生之怨憤、不和諧（如一位女士在大圍站大聲講：叫林鄭慳啲啦！），條數怕抵得住香港日均GDP（約73億元），湯家驊話香港係金融中心，停工影響大喎，唓，紐約都曾經因為大風雪而暫停啦，國際財經界對因自然災害而衍生之停市停工，早有諒解，點會因政府明令停工一日而產生問題？十月一日停工，對國際金融冇影響咩？