星島集團主席何柱國一向快人快語，甚至連特首都冇面畀，噚日何柱國喺《東周刊》一個活動致辭，一如以往批評土地供應小組廢，只識針對高球場，點知跟住上台發言嘅林鄭竟然公開還拖，搞到台下賓客眼定定，餐飯未食完已經議論紛紛，究竟乜事令佢哋公然互片？
話說外號「炒何」嘅何柱國出席《東周刊》「香港經典品牌」頒獎禮午宴致辭，佢都算客氣，一開始讚政府處理山竹防災好，不過之後佢就嚟料，先鬧有份報紙嘅專欄作者「余錦賢」話，《星島》寫反港獨嘅嘢，只係建制派而唔係中央意見，寸個作者可能俾「毒蚊」針到白癡兼冇腦，仲話《星島》文章出街後，中央港澳工作協調小組組長韓正即講港獨不能縱容。炒何之後再插土地小組，鬧佢哋係廢柴，又話小組係約過佢食飯，但個個額頭寫住「高球場」幾個字，淨係識針對高球場，認為要搵地就要填海、同發展商合作。
傳「毒蚊」來自政府
點知之後到娥特講嘢，佢竟即場還拖，話原本個rundown想改到畀特首講先，好彩特首辦主任陳國基叫娥特千祈唔好制，一定要畀炒何講先，然後佢先回應，因為特首講嘅先算數，仲讚陳真係好叻！跟住不點名寸《星島》，話政府並非如某報所講縱容港獨，土地小組亦絕對唔廢。最後娥特仲暗寸《東周刊》，話經典品牌要有三個特質，就係credibility、reliability同埋與時並進，《東周》長遠做唔做到？叫大家拭目以待！
台下賓客睇到兩人交火無不議論紛紛，究竟炒何口中「毒蚊」係乜水？娥特何解無端端特登讚陳國基？有政界中人話，其實之前《星島》文章已提過有「毒蚊」喺反港獨問題老點人，當時政圈流傳「毒蚊」係政府中人、甚至有傳係嚟自特首辦，娥特要以正視聽，唔想傳聞亂傳，自然要反擊炒何。另一政界中人仲話，炒何唔係第一次踩土地小組，叫小組咪搞高球場，唔知炒何係咪覺得小組冇重視佢意見，所以繼續係咁踩，但據聞政府內部對此頗有意見，娥特自然要反擊撐小組。
李八方