上星期六凌晨1點幾，九巴車長湯先生放工後乘搭N241通宵線九巴返屋企，佢上車冇幾耐，突然有個男乘客衝去車頭，情緒激動不停要求車長畀佢落車，佢仲伸手好似想搞個軚盤干擾車長，好彩俾車長及時捉住佢隻手阻止。個男乘客大吵大鬧接近兩分鐘，到巴士埋站畀佢落車先平息事件。
N241線由紅磡站開往青衣長宏邨，過咗美孚巴士總站，開緊去蘭秀道期間，有個男乘客突然走去車頭，不停同車長講要落車，又叫車長報警等差人嚟趕佢落車，車長同旁邊嘅乘客都勸佢冷靜啲。最終巴士駛到蘭秀道個站，車長就開門畀佢落車，個乘客仲心生不忿、念念有詞：「你喺蘭秀道先畀我落嘅，根本唔公平，係都要人行。」湯先生同其他乘客估計嗰位激動男可能情緒有異。九巴嘅乘客須知列明，除咗因為安全理由外，乘客唔可以騷擾車長。