城巴俾樹枝插中照行車？噚日朝早8點半，讀者黃小姐喺柴灣環翠邨搭城巴118線過海去九龍，佢喺上層發現有一支米半長樹枝擱喺尾三排嘅凳同地下，對上嘅巴士頂就穿咗個窿露出隔熱棉。黃小姐通知車長但換嚟對方冷淡反應，繼續行車。
118線由小西灣往來長沙灣，《蘋果》稍後喺旺角荔枝角道搵到嗰架城巴，當時車長已通知控制室，佢將樹枝移放路面，然後揸架巴士返廠維修。城巴發言人解釋，巴士行到海底隧道收費廣場嗰陣，有乘客通知車長巴士上層有樹枝貫穿車頂，車長完成落客後上咗上層檢查，由於受損部份冇構成即時危險，為免延誤乘客行程所以繼續行駛。
當駛到車流較少嘅荔枝角道基榮小學巴士站時，車長再通知公司，然後安排車上幾名乘客轉乘其他車輛繼續行程。事件中冇人受傷，巴士其後返回車廠檢修。