早排陳凱欣向九龍社團聯會提出唔做佢哋嘅健康大使，當時九龍社團聯會話會搵人代佢個位，八方就諗邊個名人肯咁抵得諗，接陳凱欣用完即棄嘅健康大使呢？估唔到咁快呢個人選就揭盅，原來係有「亞洲車神」之稱嘅黃金寶。
九龍社團聯會搵到黃金寶做新嘅健康大使，原本掛陳凱欣海報嘅紅隧出口大廈外牆廣告位，亦已換上黃金寶嘅巨型海報。聯會同傳媒講，話黃金寶喺多個國際賽事屢創佳績，為港爭光，近年仲成日同年輕人分享經驗，鼓勵年輕人抱持樂觀和積極態度去面對逆境，所以搵佢做健康大使，不過八方估最重要係佢曾經撐老董、林鄭選特首，搵佢絕對政治正確。
不過陳凱欣話就話唔做健康大使，但八方見九龍社團聯會fb仲係貼滿陳凱欣做健康大使嘅活動相同宣傳品，話晒個會用咗咁多錢幫陳凱欣谷人氣，怕且未到陳凱欣報名參加九西補選，都唔會將啲fb宣傳品下架。