中超唯一希望出局！禮拜二亞冠八強次回合賽事喺澳門上演，失去韋素同埋莫迪斯迪兩大外援嘅天津權健延續頹勢，狂吞日職鹿島鹿角三蛋，兩回合計以0:5大敗出局。
內地媒體之前就話，因為天津開緊達沃斯經濟論壇，出於保安理由，呢場比賽要移師澳門，當地日前都受到颱風山竹蹂躪，但對場地冇大影響，可以如期上演。澳門都算係半個主場，有唔少內地球迷到場支持天津權健，佢哋喺上半場九分鐘就有埋門機會，王永珀禁區頂高難度倒掛，不過離門太遠威力不足。四分鐘之後權健就失守，遠藤康開出角球，由無人看管嘅沙真奴頂成1:0。到咗27分鐘權健又再失守，內田篤人右路傳中，安部裕葵接應一射入網，比數領前至2:0。易邊後鹿角再下一城，權健守衞全部眼神防守，眼白白睇住土居聖真喺66分鐘接應沙真奴傳送射入，大勝3:0完場！