山竹颱風襲港，威力驚人。左丁山已經忘記1962年溫黛嘅破壞性，而且嗰陣年紀細，住在洗衣街，好似唔多覺，當時冇電視、冇電話（全層樓五六伙人只有一部），溫黛大災難，係事後先至知道。依家點同呀，WhatsApp滿天飛，影像實時傳到，電視台24小時報導，蘋果動新聞不斷update，人困在家中，已知大澳、杏花邨、將軍澳發生甚麼事。
天文台早已預警山竹破壞力，但上星期五星期六陽光普照，怎不令人懷疑山竹是否又會轉方向，不來香港？9月15日星期六係全年幾個大好日子之一，左丁山到尖東帝苑酒店，未到入席時間，走出尖東海旁由南洋中心對開行到Victoria Dockside，再行番轉頭，只見維港海旁異常寧靜，船隻全無，海浪不興，一滴風都冇，熱到飛起，心諗：「難道這就是風雨前的寧靜？」飯後返屋企，睇完曼聯對屈福特場波，窗外仍然無風無雨，已知道星期日冇馬跑，於是好安樂上床見周公兼諗定起床後寫稿。
誰知六小時後醒來，聽見窗外狂風聲，聲音似行雷，急忙檢視面向馬場嘅窗門，苦也，全部滲水，風不斷衝擊客廳落地玻璃大窗，「蓬蓬蓬蓬蓬」如拳拳到肉。唔顧得咁多咯，到廚房搵到十幾個膠袋，與太太爭取時間，待風聲稍歇，即刻打開窗門，以膠袋墊在窗下。然後閂窗，將窗隙滲水阻截，如是者搞咗六七個窗，每次爭取五秒歇風時間，極度緊張。但有效果噃，大風大雨之下，窗門不再滲水，於是用大毛巾及報紙索水，待清理完畢，已成身軟晒，忽見客廳落地大窗被狂風吹開，暴風捲入，左丁山大驚，撲前拉埋大玻璃門閂死之，事後才知驚，狂風可把左丁山捲出露台外也。
一番周折之後，身心俱疲，個肚又餓，家中最就手之食物就係月餅，於是吃了一個，那管得膽固醇，跟住狂風又來一記「鐵棒敲窗」，突來一聲巨響，左丁山嚇到成個跳起，慌忙走入廚房暫避。
到咗一點幾，已冇事可做，電視之風暴新聞播完又播，變成舊聞了，才醒起是日無人派報紙㖭，於是創下幾十年來第一次冇睇報紙嘅紀錄。寫稿呀？人攰腦倦，精神恍惚，索性上床再發夢去了，點知太太呼叫，天花板滴水，梗係上一層樓窗門滲水太多，由地板積滿水滴落嚟喇……唔理咯，比起杏花邨老友，已幸福太多，搵個大碗載水可也！