工聯會會長吳秋北早前批評法官係「青年殺手、社會罪人、專業失德」，上周二遭娥特不點名表示「遺憾」後，噚日有約10名自稱來自「擁北個人小組」嘅「擁北者」一早現身特首辦示威區，話為咗聲援吳秋北而向娥特抗議。
搞手為工聯會元老梁富華
原來呢個「擁北者」由出名「左」嘅工聯會前副會長梁富華成立，不過「擁北者」講就無敵，一見到娥特就變身做「沉默之聲」。
話說十幾個「擁北者」成員掛上「不滿行政長官對港獨只識遺憾，對愛國者就強烈譴責」嘅橫額，又高舉寫有「要求與中央保持一致，對港獨0容忍！」、「保護陳浩天，斥責吳秋北，公道嗎？」標語，其間叫咗幾句「反中亂港獲姑息，愛國愛港受打擊」口號，但就拒絕接受傳媒訪問，只派幾名代表入特首辦準備向娥特遞信。
八方現場所見，佢哋以長者為主，而梁富華一入特首辦，連口號都唔見嗌一句，即使俾同場示威者鬧，梁富華同一班「擁北者」仍然默不作聲。到娥特去到示威區時，梁富華仲主動同娥特握手，不過娥特無親自接信，只由助手代接，呢班「擁北者」聲援吳秋北咁沉默，唔知會否考慮改名叫「沉默之聲」？
李八方