「山竹」肆虐香港後，公共交通幾近癱瘓，一眾打工仔為上班煩惱之際，就只見到運輸署署長出嚟交代，作為問責官員嘅運輸及房屋局局長陳帆就影都唔見，更加唔好講話係面對市民同傳媒，反而保安局局長李家超幾次現身交代，仲話政府最快下月召開跨部門會議檢討，當中包括陳帆負責嘅交通問題。好多網民似乎好掛住陳帆局長，紛紛貼「拋西瓜落海圖」，問陳帆究竟幾時先肯上水見人？
八方為幫廣大網民求個明白，只好問政府陳帆局長去咗邊？政府發言人回覆查詢時話，其實陳帆「一直有參與政府內部商討應對超強颱風山竹襲港前後的會議，亦與相關政策局及部門的同事保持緊密溝通及協調」，又指運輸署轄下的緊急事故交通協調中心，是負責24小時監察全港交通情況及在發生事故期間，協調各種公共交通服的安排，所以前日由運輸署署長陳美寶會見傳媒，向公眾交代「山竹」襲港後公共交通服務的情況。不過陳美寶係公務員，全香港幾十萬打工仔嘅不滿，由個公務員去頂，咁問責官員仲要嚟做乜呢？