今季由比歷連尼出任領隊嘅韋斯咸，喺英超開季以嚟四戰俱敗，周日作客面對四戰不敗嘅愛華頓，陣容方面同對狼隊嗰場做咗了六個調動。其中，首度正選喺聯賽為「槌仔」披甲嘅耶莫蘭高，開賽11分鐘就接應阿拿奧杜域傳送後射入，槌仔領先1:0。31分鐘，麥克盧保助攻予耶莫蘭高，後者助槌仔領先至2:0。
雖然「拖肥」喺上半場補時由基菲爾施古臣頭槌頂入而追成1:2，但阿拿奧杜域喺61分鐘接應奧比安嘅傳送後亦建一功，槌仔幫最終以3:1戰勝拖肥，打破咗後者今季不敗之身。韋斯咸取得今季首捷後，以五戰得三分升上英超第16位，愛華頓以一勝三和一負得六分排喺第10位。
工程師生日贏波
比賽當日（9月16日）亦係韋斯咸領隊比歷連尼65歲生日，佢喺賽後表示，勝利係球員們可以畀佢嘅最佳生日禮物。佢亦成為自去年嘅前阿仙奴領隊雲格之後，第一位喺生日英超贏波嘅主帥，巧合嘅係，兩隊所贏對手都係愛華頓。比歷連尼賽後稱︰「今日我並冇着緊自己生日，我只係想比賽，呢個係球員畀我最好嘅禮物。」