一個「山竹」，搞到香港滿目瘡痍，幾乎度度有塌樹堵路，不過無論情況何等惡劣，都阻止唔到香港人堅毅返工嘅心，有人要喺折斷樹幹之間空隙步步為營，亦有人返到碎晒玻璃嘅辦公室大作戰，大量二次創作圖片應運而生，相信都係向堅持返工嘅港人致敬……雖然大家如果有得揀，相信都係揀唔返工嘅……除咗林鄭，唔會有人反對啩？
「男主角」任職銀行
一張以「返工」為題嘅電影海報噚日瘋傳，劇本由「the poor guy」寫成，導演當然係特區政府，主角就係「香港打工仔」，面對佈滿倒塌樹木嘅馬路，也堅持「踏上這無盡旅途」。另有網民惡搞海報嘅原相，除咗喺當中加插暴龍顯示決心，亦有人配字指港人就是傳奇（legend），「在香港，世界末日也是要上班」，當然唔少得一大班港人喺折斷樹枝間又行又爬嘅「盛況」，而水浸及膝嘅「生還者」，都令人睇到怵目驚心，「如果只係剩低你一個」，都咪話唔驚驚。
至於相中男主角，原來係香港土生土長嘅澳洲人Ed，Ed嘅女友接受《蘋果》訪問透露，Ed喺銀行返工，由於住寶雲道，平日都會行落山去金鐘站，但受塌樹影響，平日15分鐘路程花咗25分鐘。Ed女友話，拍攝位置相信為堅尼地道，佢噚日喺網上睇相片已認出Ed嘅背景，又話男友同佢講成個路程唔算辛苦，但覺得有啲煩。對於網上二創兼瘋傳佢男友張相，佢話Ed唔介意，仲覺得好搞笑，Ed又認為昨日情況根本唔適合返工，政府應宣佈全港停工。
呢場意志大磨練，梗係要多謝林鄭，周日嘅蹂躪，當然係天災，但唔少人認為噚日混亂，肯定係人禍，「特首坐凌志，返工好easy」，一句總結晒！
李八方