隨住山竹遠離香港，相信大部份港人前都鬆一口氣，安心瞓番場覺。但一班香港眾志成員包括蔡俊賢、梁延豐、同埋露腰造型有啲似「港版羅拉」嘅金髮何嘉柔，就喺噚日凌晨組成小隊，戴住手套攞住小型鋸刀，擸架生型爆喺社區同馬路出動，氣勢凌厲莫非搞場大茶飯？
原來呢班眾志成員有見山竹吹襲過後，四處都有幹道或行人路被倒下嘅樹木阻塞，自發協助移除倒塌樹木，希望每個香港人都可以為自己社區出一分力，幫手清理小型垃圾，據聞型爆小組清理至天光先收隊。
眾志喺fb話，天一光，街坊就要趕去返工，但係街上面仲有咁多潛在危險，仲要花好多時間先有得上車同人逼嚟逼去，「其實澳門都有得放一日假等處理好街上面各種情況先，點解香港都仲要逼一班打工仔辛辛苦苦返工？」唔少網民都讚眾志成員呢次自發行動，但亦相當擔心佢哋嘅安全，叫佢哋要做足安全措施。