人生有幾個500球？作為職業球員，可以到一次累積500球嘅里程碑其實已經好叻。傳奇射手，目前效力美職聯洛杉磯銀河嘅伊巴謙莫域，喺上周六聯賽終於到達500大關，仲以一記怪腳妙射入波，非常切合佢作為神級前鋒嘅身份，迎嚟職業生涯各項賽事嘅第500個入球。美中不足嘅係，銀河有伊巴入波，喺呢場聯賽都要輸波，3:5作客不敵FC多倫多。
入世界波銀河照輸
多倫多同銀河目前喺東西岸都係排喺前六名以外，要搶分爭入季後賽。主場出擊嘅多倫多頭威頭勢，踢到36分鐘已經領先到3:0。完半場前伊巴嚟料開始大反擊，佢入楔接應中場莊拿芬杜斯山度士嘅長傳，先以自身左腳作為支點自轉半圈，再單腳跳起之後，在稍稍背向龍門情況下施展一招「神龍擺尾」，皮球刷柱入網。多倫多門將阿歷斯邦路只可以呆企睇住個波入網。伊巴謙莫域神乎其技嘅入球，甚至有唔少FC多倫多嘅主場球迷，都起身鼓掌，寫個服字。銀河之後再由奧拿卡馬拉同羅夫費舒查各入一球扳成3:3，可惜完場前多倫多再發力連入兩球，銀河終以3:5落敗。
同巴特利爭執被寸
伊巴由馬模出道，之後效力過阿積士、祖雲達斯、國際米蘭、巴塞隆拿、AC米蘭、巴黎聖日耳門、曼聯到銀河，加埋之前喺瑞典國家隊上陣116場入62球，加埋啱啱好500球（見附表）。伊巴喺賽後都好沾沾自喜咁話：「今次唔係第一次，喺作客情況下有主場球迷為我嘅入波起身鼓掌致敬。」伊巴成日入神級入球之餘，亦係一位「惹火尤物」，不時喺場上同對手有拗撬，今場就同對手中場米高巴特利有衝突。伊巴話：「佢以為自己係足球哲學家，我入波多過佢比賽場數，所以好應該安份嘅。」米高巴特利亦對伊巴有回應：「大家似乎好關注佢，但對我嚟講完全唔會在意佢點諗，在意嘅只有今場比賽拎到嘅三分。」