颱風山竹來襲，撞正結婚大好日，唔少新人都要將婚禮改期，但旅遊界立法會議員姚思榮就趕得切喺風暴來臨之前，前晚（上周六）已經飲咗杯新抱茶！
容海恩變「求子石」
前晚三號波下嘅喜宴現場，政經界猛人無懼風雨捧場，連忙於應對山竹嘅特首林鄭月娥都有親身到賀，其他來賓仲有政務司司長張建宗、保安局局長李家超、商經局局長邱騰華、發展局局長黃偉綸、立法會主席梁君彥等，立法會同事更加踴躍捧場，民建聯主席李慧琼、新民黨主席葉劉淑儀、實政圓桌田北辰等都執到正到場。
其中葉劉仲孖住上月新婚燕爾兼陀B、雙喜臨門嘅黨友容海恩到賀，葉劉其後喺facebook爆料，話現場嘉賓都有講笑咁話，要一對新人多啲靠近容海恩，「以沾旺氣，早生貴子」，咁最開心就應該係抱孫嘅老爺姚思榮喇！
前晚姚思榮囝囝Raymond着住一身白色禮服，十足白馬王子，新娘子Sarah就一身粉色婚紗，飲新抱茶嘅姚思榮成晚笑到四萬咁口，真係隔住個mon都感受到佢嗰種喜悅，八方都祝一對新人幸福美滿，打風都打唔甩。