肥仔K教四歲女兒讀成語故事，以新出版圖書為教材，女兒每次聽完，望吓本書，就失去興趣，要求肥仔K講英文故事。英文兒童書印刷精美，插圖一絲不苟，而且種類繁多，令人愛不釋手，上次在曼谷Asia Books，左太買完又買，卒之要由左丁山喝停（按：買兒童英文書，曼谷好過香港，選擇更多）。肥仔K與小YY之女兒睇英文卡通，看英文兒童故事，久之彼此用英語交談，講開廣東話，會突然打個眼色：「let's speak English！」
肥仔K話唔得喎，雖則佢自己日日收潤筆費為他人寫演講詞、寫文稿，皆以英文為主，但女兒對中文冇興趣就一定唔得！於是最近日日對住女兒講成語故事。
佢諗番起自己細路之時，係睇無綫／博益集團之「成語動畫廊」大嘅，但該書現已遍尋不獲，博益執咗笠，版權唔肯出售，冇符！唯有去公共圖書館搵，結果搵到，於是借書嚟教女，舊版「成語動畫廊」因為插圖精美，夠吸引，女兒好鍾意，纏住肥仔K不放，於是一口氣講咗「畫蛇添足」、「焦頭爛額」、「此地無銀」、「覆水難收」四個故事，講到口攰，肥仔K嘆曰：「時代進步，兒童書都係舊時好！」舊到幾時呀？左丁山兒時只睇過武俠連環圖，打打殺殺，冇教育性。陶傑年輕啲，兒童時代就有「兒童樂園」提供養料，唔怪得陶傑叻過左丁山咁多。
「兒童樂園」絕版多年，但有一位有心人係名教授之後，自己在柏克萊、聖地巴巴拉讀完書後，回港在科技大學做土木工程學助理教授，發起宏願，到處搜尋「兒童樂園」，幾年前卒之有人介紹佢認識「兒童樂園」嘅社長張浚華（新亞哲社61），知道張師姐藏有全套兒童樂園，於是逐頁逐頁掃描入電腦，總共1,006期（1953-1994）電子化，設立網站（childrenparadise.net），存於Google Drive，有Google電郵便可登入，香港家長如有興趣教孫仔孫女，兒子兒女可重溫「兒童樂園」。呢位付出努力，為香港留存美好兒童文化嘅助理教授就係胡惟忠博士，他的祖父是中文大學聯合書院在上世紀五六十年代的重要人物、社會學系主任胡家健博士，胡先生與胡適同輩，差不多同一時間留學美國（同是庚子賠款學生），兩胡甚有交情；胡先生桃李滿門，胡惟忠博士話小時候見到影視紅星許冠文到家中拜年，嚇了一跳，後來先至知道阿爺係許冠文嘅老師。