每逢打風，總會令人期待MJ潘重登大銀幕，喺風雨中為大家帶歡樂。事隔9年，同樣係9號強風，同樣都係尖沙嘴，無綫男主播潘蔚林終於「復出」，噚日朝早喺尖沙嘴海旁做直播。千呼萬喚始出來，9年後嘅潘蔚林，明顯「踏實」咗噃，面對山竹來勢洶洶，都淡淡然企定定，唔再似當年7月中某個凌晨，45度傾斜，喺海旁同莫拉菲鬥力。留意番，今次MJ潘嘅頭盔，戴得好穩陣吓。大家應該唔會忘記，當年佢擘腳紮馬赤腳嗰個look啩！
同事硬食湧浪幾乎跌
而喺MJ潘變得穩重之際，無綫另一位記者嘅風雨中直播，則令人睇到巧驚驚，事緣無綫新聞通宵喺杏花邨海旁直播風暴最新消息，呢個位，眾所周知每逢颱風襲港時都係大風大浪，睇見嗰度海邊嘅長凳堆積嘅沙包，通通都被吹散，就知道山竹威力有幾大，難怪連無綫記者張家灝噚日朝早喺杏花邨報道時，都被湧浪撲至企得唔穩，幾乎跌倒。
除咗傳媒，仲有好多唔同行業人士如保安員等，颱風中都要當值，都係為咗保障市民嘅安危，真係要向佢哋致敬呀。
