德甲拜仁慕尼黑上周六對利華古遜，開賽兩分鐘已因堤亞高艾簡達拿手球失12碼，對手禾蘭操刀宴客，但因有拜仁球員衝入禁區，球證判重射，結果利華改由雲達爾拿斯文圖操刀領先1:0。拜仁踢至10分鐘由哥倫天杜利素扳平1:1，九分鐘後輪到洛賓發威，禁區偏左位置窩利抽射，笠過利華新門將哈迪基頭頂入網，反超2:1。換邊後，後備上陣嘅占士洛迪古斯接應艾簡達拿傳送頂入，助拜仁反勝3:1，開季三連勝續居榜首，歐聯作客賓菲加前打咗支強心針。 不過，哥倫天杜利素就半場前整傷膝部十字韌帶退下火線，家陣確定要唞幾個月，而被比拿拉比惡意侵犯嘅拿菲爾，都要休戰幾星期。