一個可愛小朋友，竟被人獨留街頭，你話邊個會忍心呢？噚日凌晨零時許，讀者安先生行經紅磡庇利街與馬頭圍道交界路口時，發現一名男童企喺街邊喊到收唔到聲，有一名青年見狀喺身邊從旁安慰。安先生好奇企喺度了解，佢聽返事發經過，隱約聽到男童喊住講：「婆婆飲醉酒，留低我喺度企……」男童一邊喊，一邊話想返屋企，青年見到附近冇親友接走佢，擔心男童冇人照顧，於是打電話召警方到場處理，之後警員到場確認男童安全後，問到男童講出外婆嘅電話，打番畀外婆叫佢到場接走小朋友。
警方就話噚日凌晨零時許，一名21歲姓黃男途人，報案稱一名6歲姓周男童在街頭獨自徘徊，懷疑佢同親人失散，經警員到場證實男童冇受傷，其後叫咗男童親友到場接走，案件當做流浪兒童處理。