超強颱風「山竹」襲港，喺室內都覺得風勢猛烈，落樓就更加有啲搵命博，有意再戰明年區選石塘嘴嘅傘兵、西環飛躍動力召集人葉錦龍（Sam），噚日朝就冒險落區視察，仲直播西環現場情況。雖然佢着咗雨褸、反光衣，仲戴咗頭盔，片中見到風勢越嚟越勁，八方邊睇都邊替佢揑一把冷汗！
Sam呢次做咗兩三次直播，未掛十號波時，佢先到皇后大道西，見到有招牌搖搖欲墜，所以報警求助，同時去咗巡視部份渠口，慎防淤塞搞到水浸；到之後掛咗十號風波，佢都冇返室內避一避，反而去咗山道嗰頭，佢自己都話「（風勢）真係可以吹得郁人，真係冇咩事唔好出街」，而由佢企喺條街講呢番說話，似乎冇乜說服力，好彩佢話自己唔係搵命博，都準備撤退。
好多街坊睇直播時都叫阿Sam小心個人安全，八方相信好多人落得區為社區服務都好用心，但係打風呢啲緊張關頭就應安全至上，無謂要街坊擔心。