皇家馬德里上周六西甲作客只能夠以1:1逼和畢爾包，由於衞冕嘅巴塞隆拿同日作客憑蘇亞雷斯及奧士文尼迪比利各入一球，以2:1擊敗皇家蘇斯達，銀河艦隊今季聯賽只完成四輪比賽後，已經被宿敵拉開分差。畢包前鋒迪馬高斯32分鐘接應隊友短傳殺入禁區，趁皇馬門將泰拔高圖爾斯出迎，以及華拉尼包夾前橫傳，造就蒙尼恩門前輕鬆射入，主隊半場領先一球。皇馬下半場傾力反撲，新帥盧比迪古喺61分鐘以艾斯高入替克羅地亞中場莫迪歷，艾斯高後備上陣僅兩分鐘就入波，兩隊最終踢成1:1完場，皇馬賽後以四戰得10分續排次席，落後榜首四戰全勝嘅巴塞兩分。