上世紀港胞打風困在家裏開枱打麻將的習俗，不知道是否仍然廣泛流傳，新人類由朝到晚對住個芒，遊戲選擇多的是，一機在手自覺無往不利，大概不屑陪阿爺阿嫲攻打四方城，但請恕烏鴉嘴講衰嘢，山竹這種威力的巨風打到嚟，不但隨時停電，連網絡線路也有斬斷可能，不一早霸定東南西北，到時燭光下酣戰的四人組唔受你玩，咪怨天怨地啊吓。很久以前聽說美國鬼婆也會打麻將，抵達三藩市後，發現那些熱情牌友大部份是老一輩猶太婦女，百思不得其解，問來自紐約的猶太大隻仔H先生，他也說不出所以然，可能怕我有朝一日「見家長」時摵起條筋，自動獻身陪未來奶奶（或岳母）打番四圈吧，特別提醒美國牌規矩別創一格，自以為憑香港牌大殺四方的爛賭鬼切勿叻唔切，輸到甩褲咎由自取。
菲立羅夫的《波特耐症候》好幾次提到麻將，拼音寫成古古怪怪的mah-jongg，不是如今通行的mahjong，乍見我還以為落伍串法，上網一查，原來特登高掛雙g旗幟，以資識別打的是美國牌，國內還有維護秩序的麻將總會，年年更新食糊圖表──似乎和我們的通勝有點相似，又或者像負責正字正音的法蘭西學院，真係唔講得笑。羅夫的男主角家教森嚴，直到發育期都努力配合喜歡軟性發號施令的媽媽，裙腳仔任務之一，是雀局幫手洗牌砌牌。他對這些猶太大媽懷恨在心，「假設母牛識講嘢，講嘅睇怕都係呢類無聊嘢。對，或者此乃最佳解決方法：當佢哋係獲欽賜雙重奇蹟的母牛，識講嘢，同時識打麻將。」我擔心的是，呢位仁兄停不了打飛機，砌牌前都唔知有冇洗手。