巴黎聖日耳門（PSG）球星尼馬同NBA勇士球星史堤芬居里上周一齊出席活動時，兩人惺惺相惜，互相交換波衫。兩人見面時都難掩興奮之情，交換波衫之餘亦交流心得。居里係三屆NBA總冠軍功臣；尼馬則係巴塞隆拿2015年奪歐聯嘅核心之一，兩人成就地位可以話係旗鼓相當。
至於衞冕嘅PSG喺上禮拜五晚嘅法甲主場「讓車馬」情況下，憑住達斯拿、卡雲尼、迪馬利亞同埋19歲小將穆沙戴亞比嘅入波，贈聖伊天四隻光蛋，為周中歐聯首輪分組賽作客晏菲路鬥利物浦之行壯行色，預料到時尼馬同基利安麥巴比會雙雙復出掛帥攻堅。
講開尼馬，佢喺國家隊兼PSG老死丹尼爾，就希望尼馬唔好再喺球場上插水，以免被人針對：「我好熟識尼馬，有時候經歷會令一個人進步，我想喺世界盃嘅經驗會令尼馬改變，由一個小伙子成長為一個大人。喺成長後，佢嘅行為同想法都會改變，有時候誇大嘅動作係保護自己，但亦係時候作出改變，因為佢嘅動作成為咗傳媒嘅焦點，點都係唔討好。」
