前車路士隊長泰利因為家庭原因選擇唔去俄羅斯落班後，藍戰士領隊沙利就開腔表示歡迎呢名昔日隊長回歸，出任教練工作。沙利喺賽前記者會就話：「上一次我同泰利傾偈嘅時候，佢話想再踢多季。我呢刻唔係太清楚佢嘅處境，但車路士就係佢屋企，我哋歡迎佢隨時返嚟。」37歲嘅泰利今夏同英冠球隊阿士東維拉約滿後一直未有班落，而佢啱啱就拒絕咗俄超嘅莫斯科斯巴達邀請。