還有10日便到中秋節，走進人來人往的深水埗舊區，穿過一幢圍上棚架的唐樓，橫越一個重建中的地盤，來到一家座落於南昌街已數十年的餅家，店舖裝潢低調，但開業52年來每日客似雲來，每逢中秋更忙個不停手，全因餅家堅持人手做餅，雖然生產速度比起主流機器製月餅相差十倍，但餅家第二代傳人張子榮（榮哥）深信慢工出細貨，他最自豪餅家的出品多人買、多人食，「冇咗啲人有啲失落㗎！」傳承一門手藝，除了需要有心人落足心思經營，更需要捧場客支持。
撰文：李晟謙 攝影：簡明恩
榮哥經營的八仙餅家，舖面擺滿各式唐餅，當眼處正是熱賣的各款月餅。穿過一旁的收銀櫃枱步入工場，6名師傅圍着木枱，正在製作雙黃蓮蓉月餅。其中兩人將麵粉團搓成餅皮，另外兩人為蓮蓉團包上鹹蛋黃，再放上電子磅量度重量，切去多餘蓮蓉，交由老師傅包好放入模具整成月餅，最後一人烘培約15分鐘，大功告成。
「有8包糖要送過嚟！」舖面姐姐喊道。「拎開啲盤放入去先」，舖頭的第二代傳人榮哥指揮着大局。餅家前身是1966年開業的茶樓禮餅部，1978年茶樓因興建地鐵導致生意慘淡而結業，從長沙灣落戶至深水埗現址，繼續由擔任茶樓禮餅部掌櫃榮哥的父親經營。
行年54的榮哥身材圓潤，樣子敦厚，一生結緣餅家，替人送上祝福。他說十多歲時便到茶樓禮餅部幫手派月餅，「供完月餅會你攞餅卡嚟，大份就兩抽，細份就一抽，執好晒喺度，攞張卡打個印就畀你」。那時候茶樓為方便員工凌晨開工，會提供宿舍，榮哥父親任掌櫃職位較高而分得一間房，所以一到暑假榮哥便會由元朗出九龍，「嗰時幫手係貪玩，唔係正式工人」。
「太子爺都要做㗎，冇特別優待。」
中學畢業後榮哥曾外闖遊山玩水，至一兩年後心定，18歲正式到深水埗的舖頭幫手，「嗰時想搵嘢做，冇話刻意入行」。初頭榮哥只是在舖面賣餅，「賣賣吓整餅師傅唔得閒，咪幫手整餅，冇乜正式教，都係自己偷師，你肯學，佢（師傅）就肯教你，我𠵱家好多餅都識整」。雖然是餅家太子爺，但榮哥說得直接，「太子爺都要做㗎，冇特別優待，都係同埋一齊做」，日做12小時是等閒事，一年更只有中秋、端午，冬至及過年放假。
最初幾年榮哥與父親更日夜都在餅家過活，晚上收工後便洗澡、讀報，然後在店舖中打開兩張床鋪休息，「嗰陣時呢度（深水埗）未有地方住。悶？都係㗎，咪出去公園行吓」。一位餅家負責人、一位太子爺，日日也在捱世界，「當時都唔係小康之家，生活掹掹緊咋，係兄弟姊妹陸續出身先至好啲」。
榮哥入行時80年代正值行業的黃金時代，中秋節及農曆新年人流最旺，每年零售及月餅會可以賣近6萬盒月餅，顧客要在店外排長龍。不過後來有大集團分一杯羹，投放資源宣傳，小本經營的榮哥自然較遜色，餅家的生意慢慢回落，「食餅嘅人冇少到，但競爭多咗，又有連鎖店競爭分薄晒啲生意」。現時中秋節餅家若能賣到萬多盒月餅已是驕人成績。
榮哥說，每年端午節過後便開爐做月餅，農曆6月初便開始零星發售，到中秋節前約一個月，要移師葵涌的工場趕工，每天產量可達數千個。那時候，榮哥擔任護士的胞弟便會請假回來幫忙，年年如是。
八仙餅家通常整月餅至農曆八月十三日，榮哥表示：「第二日洗嘢，然後過節，呢個行規嚟，以前會去酒樓一齊食餐飯，𠵱家畀利是各自各聯歡。」雖則如此，但中秋節後，餅家仍然小量製作月餅滿足愛好者，至過年前，騰出人手製作賀年食品。
「入行30年，整餅最巴閉！」
餅家出名蓮蓉月餅，「試過食同行月餅，真係有分別，我哋月餅仲靚過佢」，榮哥說他們出品的月餅「蓮蓉香、冇得輸」。傳統的豆沙月餅、五仁金華火腿月餅亦是店舖的招牌貨。現時機器製月餅每分鐘可以生產逾百個，相反人手製造每分鐘最多生產十多個，但即使如此，榮哥依然堅持：「（人手製）整得好食囉，我哋用料正、新鮮，第二度買唔到咁新鮮嘅餅。」講到做餅，榮哥最自豪。
做餅30多年，這手藝是榮哥一生成就，「整餅都係最巴閉啦，其他又唔識，煮飯都唔識」。榮哥入行後與父親拍住上，至十多年前父親年逾八十榮休，榮哥才正式接手餅家。
餅家所在舖位的業主是榮哥的好友，對方只要求維持一定收支平衡。無心插柳傳承一家老店，從父親手上承接的52年招牌，沒有子女的榮哥倒沒有刻意想過繼承問題，只要一日有客人支持，一日也開舖招呼，「做到嗰時咪嗰時。（即係幾時？）唔知㗎！」潮流興懷舊，追捧消失中老店，但有捧場客的店舖，何來會容易消失？
港故事
有些人有些事，越是美好越留不住。本土手藝、傳統行業、街頭老店，都帶給我們生活的溫度和記憶的厚度，如果你知道有這樣的故事，歡迎提供。（致電或WhatsApp 6383 6568 註明「港故事」）。