靜咗一排嘅前財政司司長曾俊華（圖），噚日出席港台節目《大學問》，又要回答好多年輕人嘅問題。無見一排，鬍鬚曾好似開放咗，唔少以前佢好可能會耍走嘅問題都認真回答，好似叫佢送首歌畀前特首梁振英同現任特首林鄭月娥嘅時候，佢真係講到一首幾精警嘅歌喎。鬍鬚曾話要送畀689同娥特嘅係同一首歌，就係佢孫女成日唱嘅《Let It Go》。好一首《Let It Go》，唔知鬍鬚曾心入面，有啲咩係想689同娥特let go呢？
跟住有位青年人問鬍鬚曾會唔會再參選，佢就話第一次參選係熱情、有期望咁去，再嚟就係「撼頭埋牆」。不過主持人、鬍鬚曾嘅政助羅永聰就「隊」鬍鬚曾嘅前上司、新民黨葉劉淑儀出嚟，阿聰暗寸葉劉都唔止一次想參選啦，點知鬍鬚曾寸埋一份話「有啲人嗰頭係硬啲嘅」！