與一班賽馬團體成員在上海總會吃午飯，傾賽馬事宜，傾緊之際，見到電腦J與朋友行入嚟，坐在另一邊。於是吃飯開會完畢之後，走過去打招呼，電腦J原來係同老友編輯W及一位年輕人講科技創業！呢位年輕人又係中大博士，又係新亞師弟㖭，於是四個新亞佬繼續傾落去。
年輕人博士L係2006年工學院畢業嘅，在中大讀埋碩士博士，2010年取得學位，跟隨自動機械專家徐揚生教授學習。徐教授現在係中文大學（深圳）校長，深圳、廣州內地媒體經常報導徐校長及中大（深圳）消息，讚中大（深圳）辦得好（其實學費高於內地一流大學），收生成績極其優異，新生直情係內地高考之最頂尖份子。博士L話徐教授係院士及科學家之餘，亦係書法名家，不時以書法送贈學生。左丁山聽見博士L咁講，即時醒起昔年丁衍庸先生在新亞上堂，即興送畫給學生的故事，恃老賣老咁同佢講：「徐師若有書法餽贈，收得就收！」
呢啲事情，講多便俗，問博士L現在做乜研究？佢話研究機械人（Robot）已有小成，在深圳成立一間初創公司，希望能夠逐漸發展壯大。好事吖！科技博士趁住創科大氣候，係應該趁年輕打拼，一試身手嘅。但創業之餘，亦要觀摩其他事物，身邊周圍有甚麼新科技發展，可供借鏡。
9月23日至10月2日，灣仔會議展覽中心三樓G展覽廳就有一個創科博覽2018 Inno Tech Expo，由「團結香港基金」主辦，背後落手落腳做顧問團召集人嘅就係新亞校友徐立之教授。徐立之對左丁山講：「喂，你係唔多識科技嘅嘞，到時去現場睇吓，可以增加你嘅知識！」對住佢講科學，左丁山自然似啞巴，只可以聽嘅啫，問佢有乜項目展出，佢話：「多咯嗱，成份資料送畀你。」打開一睇，「團結香港基金」又幾有人脈關係噃，展覽有工農醫三大主題，由古至今，「工」指建設，介紹長城建造結構，現代大橋工程（有VR技術以360度全景體驗港珠澳大橋）及未來智能城市規劃；「農」指農業由古代水車紡織機以至當今智能農耕；「醫」介紹古代中醫以至當今智能臂環及其人機交互技術。還有本地八大學在場介紹最新研究成果及在國際發明大賽得獎之應用技術。本港創科人士及對STEM有興趣嘅老師、家長、學生，不容錯過呀！