保特唔單止喺陸地上跑得快，睇嚟喺太空都跑得快過人。早前喺澳職球隊中岸水手試腳嘅「閃電俠」保特，喺周三就搞搞新意思，去咗法國出席咗一個與別不同嘅賽跑活動。佢搭上特製嘅飛機飛到高空，喺無重嘅狀態下賽跑。
呢位現年32歲嘅奧運八金得主，喺無重嘅狀態下亦跑得似模似樣，雖然喺過程中為咗保持平衡而跌低過幾次，不過佢都成功以第一名「浮」過終點線。除咗跑步外，佢仲好趣怪咁喺無重狀態下嘗試各種動作，同工作人員、科研人員打成一片，佢事後亦表示，雖然只係短短幾分鐘，但都已經好似入咗糖果舖嘅小朋友一樣咁開心。呢次活動係畀一班畀得起錢，又想尋求刺激嘅人，唔使上太空都可以感受到無重力嘅環境，除保特外，同行嘅仲有幾名富豪同大公司總裁。
