足球名人有副業好普遍，曼市新舊英雄哥迪奧拿同傑斯，同樣都喺曼徹斯特地區開餐廳。曼城主帥哥迪奧拿似乎有意喺曼市扎根，早前喺度買屋兼做餐廳老闆，賣佢家鄉加泰羅尼亞嘅特色食物；不過曼聯名宿傑斯開嘅餐廳就有啲問題，因為廚房太污糟、食物過期、員工又成日唔洗手，問題多多而被當地衞生督察傳召。
傑斯幾年前同兩位合伙人開咗間餐廳George's restaurant，點知上個月有衞生督察嚟突擊檢查，發現餐廳有好多問題，英國食品標準管理局評分最高分係五分，但傑斯嘅餐廳就只係得兩分，於是官員以書面通知餐廳老闆︰「檢查期間發現餐廳環境未達到經營餐飲業嘅標準，需要作出改善，歡迎去佢哋辦公室傾吓搵到嘅問題」。
兩年內第二次出事
報告話主廚將煮好嘅食物放喺準備區啲生嘅材料側邊、整好嘅焦糖燉蛋冇蓋冚住，廚房入面亦搵到過咗期嘅法式酸奶油。佢哋所見，員工冇定時洗手、垃圾桶滿瀉，地面、牆身、鋅盆同爐頭全部好污糟。衞生部門官員話會喺一個月之內再去檢查餐廳環境有冇改善。傑斯呢間餐廳今次已經係第二次俾衞生幫批評，2016年12月佢哋亦因為清潔同食物溫度控制等問題而被評得兩分。
哥帥賣加泰菜靠名廚
至於曼城領隊哥迪奧拿對曼市就相當有感情，唔止喺曼徹斯特買屋，仲開咗間餐廳。呢間今年七月開張嘅餐廳Tast，另外兩位曼城高層包括CEO蘇利安奴同埋足球總監碧格利斯坦都係股東，由加泰羅尼亞名廚之一嘅柏高佩雷斯主理。柏高佩雷斯經營緊嘅七間餐廳總共有五粒米芝蓮星星，由佢主理嘅Tast提供加泰美食，相信可以為哥迪奧拿一解思鄉之情。
曼城內部人士透露，哥迪奧拿好鍾意美食，同佢嘅高層朋友想將加泰嘅味道帶嚟曼徹斯特。開喺曼徹斯特用餐熱點King Street嘅Tast，裝修非常時尚，第一層有酒吧，第二層有餐廳同開放式廚房，第三層就提供私人包廂，據餐廳嘅侍應所講，餐廳七月尾開張以嚟，哥帥每個星期都會嚟三次，可見佢幾咁重視呢個心血結晶。