中秋臨近，美心嘅流心奶黃月餅今年掀起炒風，擅長經營蛇齋餅糭嘅建制派，豈能落後於形勢？雙黃白蓮蓉太落伍，建制派政團改以優惠價向市民兜售奶黃月，但呢個世界點會有免費午餐呢？建制派透過會員制度，攞咗市民嘅資料，先會提供優惠。為咗盒奶黃月，大家係咪出賣個人資料畀建制派都唔緊要先？
介紹人入會亦可獲雪糕券
辦事處設喺民建聯油尖旺區議員楊子熙議員辦事處嘅「油麻地居民權益關注會」，今年以200蚊「會員優惠」做招徠賣奶黃月，但其實唔係平正價好多，真係冇嚟誠意。宣傳單張寫上，「油麻地南」區嘅居民即時入會就可享有優惠。「油麻地南」嘅區議員就係民建聯楊子熙，乜講到咁明呀。
除咗奶黃月，仲有雪糕禮券優惠㖭！只要閣下肯出賣個人資料畀保皇黨，就可以用10蚊買價值50蚊嘅雪糕禮券。新會員或者現有會員介紹親朋戚友入會，都可以享有呢個優惠，似足層壓式推銷。
但大家要預咗享用完優惠，食完月餅、嘆完雪糕，日後各級選舉一到，就會收到訊息叫你投票畀建制派。今年、明年、後年各大小選舉臨近，中聯辦水喉夠力，地區市民一定兩餐無憂，佳節優惠盡享。