高大斯文Cap帽男，前日下晝走入荃灣川龍街一間寵物店，扮客人係咁問女職員呢樣嗰樣，好似有心買嘢咁，殊不知原來係賊仔，趁職員招呼緊其他客人嗰陣，一手偷走女職員擺喺收銀櫃枱嘅手機。做戲做全套，佢臨走仲擰轉頭向舖頭入面嗌，口口聲聲話轉頭會返去買嘢！
扮愛狗之人 分散店員注意
俾人偷走部手機嘅寵物店女職員阿敏同《蘋果》講，星期三下晝1點幾，嗰個Cap帽男行入舖頭，當時佢做緊嘢，整理緊個貓砂盤，見到Cap帽男喺舖頭逗留咗頗耐，又不停問佢有關寵物嘅嘢、狗狗沖涼液呀、狗仔刷牙啲嘢咁。之後有個女熟客帶隻狗嚟到，嗌阿敏行去另一邊。唔夠幾分鐘，阿敏原本擺喺收銀櫃枱播緊歌嘅手機突然冇咗歌聲，佢走出去櫃枱睇，發現部手機已經唔見咗，佢追出去已經唔見咗Cap帽男嘅蹤影喇。
阿敏即刻報警，差人去到寵物店調查，翻睇舖頭CCTV片段，鎖定目標。CCTV畫面睇到阿敏去招呼其他客人嘅時候，Cap帽男喺舖頭入面一直玩手機，又左望右望視察環境，跟住走近收銀櫃枱伸手去枱面一手偷走部手機，過程唔使一分鐘，手法純熟。警方將案件列作盜竊案調查，𠵱家追緝一個25至30歲嘅中國籍男子。
阿敏對手機俾人偷咗又激動又無奈，佢話估唔到會發生喺自己身上，見Cap帽男斯斯文文冇乜嘢咁，喺舖頭兜咗幾個圈，又好似打過電話問電話另一方個人買邊隻寵物貨品先啱，臨行出門口仲話轉頭返嚟買，最後當然乜都冇買啦。阿敏事後奉勸其他同事都唔好再擺低手機喺收銀櫃枱，行開行埋都要小心啲。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。