旅發局豪擲千二萬將深水埗擺上枱，忽然當舊區係寶，向遊客硬銷珠仔街、鈕扣街。但之前不是把最有特色的欽州街棚仔趕絕嗎？原來強行在通州街天橋底清場趕走露宿者，屈露宿者是毒蟲的建制派區議員，是幫旅發局「做緊嘢」，預早出招，等班大老細駕臨，企街篤住小吃，扮晒街坊。
這種掃街親民騷唔新鮮，做過N次，深水埗永遠跟明哥一樣都是「兵家必爭之地」，從「殯儀健康大使」那位小姐空降的時序倒流回到唐梁爭奪特首戰那一年，兩位阿叔，都曾經爬過九層唐樓，摸去何喜華那間「基層人辦屋」，上氣唔接下氣在傳媒包圍下了解所謂的民情。林鄭無「上樓」，似乎頂唔順深水埗的草根標籤，只係搵何喜華做撐奶媽發聲團。深水埗忽然被點燈，林鄭顯然不知情，她說自己老爸也是由大陸落來香港，對香港有貢獻，是香港的紅利。咁鄭伯當時係咪落腳深水埗？689和煲呔曾都係鴨巴甸街警察家族後人，林鄭讀灣仔名校，屬深水埗居民機率很低。打算推深水埗給國內遊客的旅發局，得緊急搵返幾個名人才俊撐場，竄改出身，暖吹深水埗神話。文匯報代言人容祖兒好嗎？鴨寮街天后，帶強國同胞潮買紙紮，高鐵即日來回，七嚿水有找！