駕駛人士陳先生噚日中午12點幾揸車經新田公路由屯門去上水，其間見到一架吊臂斗車載滿鋼筋廢料，尾板打開，纏到一餅餅凸出車尾，佢認為好危險，隨時有機會跌一啲落路面，簡直好似路上炸彈！
綁上紅旗都危險
事緣陳先生話大約兩、三年前，曾經試過夜晚喺元朗公路行車，佢架私家車疑轆過路面一支鋼筋，插穿車頭泵把，司機位車門穿咗個窿，佢見到一路行一路擦出火花，停埋一邊落車睇吓先知乜事，佢估計鋼筋都係之前喺運載途中跌落路面，佢先中招，所以佢見到啲斗車咁樣載廢料都有啲睇唔過眼。
運輸署有車輛載貨守則嘅指引，噚日嗰架斗車喺鋼筋廢料後面都有綁兩塊紅旗提醒其他駕駛者，但佢啲載物凸出車尾，唔知係咪都攞咗許可證呢？而現行亦有相關法例規管車輛運載貨物，保障道路安全，包括《道路交通（交通管制）規例》，司機要確保負載物適當地固定或盛載喺車輛上，而負載物嘅重量同擺放方法都唔可以對任何人士造成危險；食環署亦會根據《公眾潔淨及防止妨擾規例》，檢控令街道或公眾地方出現廢棄物嘅車輛。