上月下嫁同黨政策總裁袁彌昌嘅新民黨立法會議員容海恩（圖）噚日親證有喜！容海恩噚日同傳媒茶敍，就透露預產期係出年農曆年初一，但就無透露係豬仔定豬女，保留神秘感。至於產假方面，由於議員同立法會唔係僱傭關係，所以無有薪產假，但秘書處就建議佢請假，相信會獲批，咁佢會唔會按慣例請「前四後六」呢？佢就話唔會，反而好大機會留守到最後一刻，產假都只會放兩至三星期，仲話爭取喺宣佈財政預算案當日重返議會。
容海恩噚日仲同立會秘書處開會，除傾產假外，仲爭取設授權票同埋喺立會大樓增加哺乳設施，日內又會去信立法會主席同議事規則委員會，要求畀坐月期間嘅議員授權黨友投票，不過由於《基本法》列明立會大會議員要在席投票，所以更改空間唔大。