立法會議會聯絡小組去英國交流，前日就同「英國議會跨黨派中國小組」會面。參與呢個會議嘅教育界議員「葉Sir」葉建源就透露，身為上議院議員嘅前港督「肥彭」彭定康亦有參與，葉仲上載咗議員同肥彭合照，當中見到過去批評肥彭干預香港事務嘅工聯會立法會議員陸頌雄，以及質疑過肥彭為「港獨」護航嘅何君堯㖭！
八方發現何君堯同陸頌雄冇貼同肥彭見面相，而香港眾志秘書長黃之鋒就喺fb暗寸佢哋，「竟然跑到英國企圖攪局，聯同前港督彭定康指手劃腳，與英國國會議員討論一國兩制，明顯干預香港事務！」
「少管閒事 管好自己國家」
何君堯前晚喺自己fb直播講見肥彭，仲講到自己好英勇咁樣，寸肥彭關心香港只係門面工夫，當肥彭問議員點解香港會有港獨？何自稱引用加拿大菲沙機構調查，指香港係最自由、開放同安全嘅城巿反擊。
至於陸頌雄之後喺fb貼番同肥彭及英國議員合照，仲扮晒幽默話：「肥彭你好嘢！我叫你少管閒事、管好自己個國家先，你竟然搵人圍我？」又為肥彭整個設計對白：「陸頌雄，你已經被我同我啲分身包圍了！問你怕未？」八方睇完覺得好小學雞，以為改張圖貼上網就當自己贏咗！