各區「不能避雨亭」近期備受爭議，今次再有居民投訴喺深水埗興建避雨亭得物無所用。該區居民陳小姐表示，佢呢排行經東沙島街近聖公會聖多馬小學，發現校外多咗一個避雨亭，不過個亭所覆蓋嘅地方唔大，認為就算係雨天，學校有大批家長等仔女放學，好多人都係趕住走，仲邊會留喺度避雨，質疑阻碇兼有浪費公帑之嫌，而呢個避雨亭就淪落到成為手推垃圾車嘅車位。
我哋翻查民政事務署網頁，相信呢個避雨亭係屬於深水埗區地區小型工程項目，區內共有15個，主要喺屋邨、學校同埋商場附近興建，長度3至6米不等。深水埗區議員何啟明就話呢款避雨亭係經區議會按各選區需要申請撥款興建，部份避雨亭只有3米長，亦唔夠寬闊，僅容納少數人同時企喺度，變相降低使用率，佢都認同如果興建「真避雨亭」，至少都要5、6米長，可以擺到一兩張凳，遮到蔭又同時避到雨，咁先算係高效喎。