上月下嫁同黨政策總裁袁彌昌嘅新民黨立法會議員容海恩（圖），一直有傳佢有咗BB，但容海恩始終冇承認又冇否認，到噚晚佢接受Now新聞訪問，終於解開腹中係咪多嚿肉之謎，佢承認已經有咗BB 4個月，預產期係出年二月農曆新年，即係會生個豬BB喎，至於BB係男仔定女仔？恩恩豬話遲啲先透露。八方打畀恩恩豬恭喜佢，佢話 𠵱家有孕吐情況，一早一晚特別唔舒服，多得屋企人照顧。
奉子成婚「係個人選擇」
八方睇返訪問片段，今次奉子成婚，實有人閒言閒語，但恩恩豬喺訪問度話結婚完全係個人選擇。恩恩豬話有BB唔會減少參加事務委員會等工作，不過大肚婆要產檢、安胎，佢都話開會投票會有影響，希望立法會可以遙距投票或者建立授權票制度，其實立法會都要與時並進，搞吓媽媽友善環境，而且BB將會係立會第一B，各位議員同事都要幫手爭取啦！