任何時候都人車爭路嘅旺角鬧巿，前日下晝上演踢拖女以身攔貨車事件。讀者吳先生前日路過旺角花園街同亞皆老街交界，先達廣場對開小巴站，見到有個女人喺過路處企喺一架貨車前面，一隻手捉住貨車左邊倒後鏡，着裙踢拖嘅女人仲起飛腳踢貨車車頭，大嗌：「報警呀！」
一腳阻住成條街
嗰個女人長頭髮幾乎及腰、紮住條馬尾，着一條黑白色花喱花碌好似臉譜圖案嘅連身裙、孭住一個有Hello Kitty樣嘅袋。當時好多途人過緊馬路都望吓佢做乜，有唔少人仲同吳先生一樣，攞手機出嚟圍住佢拍片㖭，亦都有男途人好心勸佢：「唔好玩喇，俾人告你㗎，阻住人哋條路！」但個女人似乎唔領情，但吳先生就話個女人有啲鄉音，聽唔清楚佢講乜，只係隱約聽到咩差佬……你行開啦咁樣。
後面啲車塞住晒行唔到，各位搵食嘅司機大佬梗係唔耐煩不停狂呠啦，亦有圍觀嘅路人鬧個女人：「你阻住成條街呀！」但佢依然企硬。俾佢攔住嗰架貨車嘅司機可能想褪位俾後面啲車爬頭，佢倒車，然後又見佢打電話。好快一架小巴首先駛出左轉亞皆老街，跟住第二部貨車嘅司機駛過個女人身邊嗰陣，停車開窗爆粗指住個女人嚟鬧，跟住先開車走，後面條車龍先至消散。
個女人依然捉住貨車倒後鏡，向途人叫喊：「見到差佬先講啦！」吳先生話聽其他途人講，個女人聲稱俾架貨車撞到，所以攔住佢。警方表示，最初接報有女途人攔截車輛唔畀佢走，警員接報到達現場嘅時候，嗰名33歲姓孔嘅女子已經行返去行人路，而架貨車開走咗，冇辦法向貨車司機了解發生乜事，將案件列作投訴滋擾。
爆相爆片
#MeToo個個都要爆，但係唔一定要舉牌！只要你肯爆，無論好事、壞事、憤怒事，正嘢、衰嘢、古怪嘢，影低佢，《蘋果》幫你爆，更設爆相爆片大獎賞，除咗爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。