因為P2P爆煲損手的內地女子上吊身亡，家屬向公安追究，要有一個說法。
有！湖北武漢姚姓男子在輕軌站企跳，警方消防救回後被法院裁定尋釁滋事罪成！獲刑18個月緩刑兩年。自殺不遂，唔使林鄭發話，一定係「踩紅線」！姚男被控因企跳影響沿線列車中斷40分鐘，受阻乘客估算約30萬，下午五點半才結束，擺明阻人搵食，喔，阻人收工才對！強國打工仔對企跳的容忍度降至零，試過唔少case，圍觀途人不耐煩地向企跳者喊「快些跳！」姚男好彩，無遇到冷血同胞，其他自殺者冇咁走運，N人「應群眾要求」墜下。看熱鬧的見無戲唱，一哄四散。P2P爆煲受損的民眾，上訪遇着武力驅散，企跳死控，反過來隨時被控「造成公共場所秩序嚴重混亂」！千古艱難唯一死，尋死被屈尋釁滋事，唔死呢，更加一身潺！很久前讀過一本「完全自殺手冊」的攻略，沒包膠的，更新資訊的話，內地自殺，早晚會被追加罪名、家屬必須承擔社會罪責，罰到你怕，依法辦事！死囚家屬被追收子彈費的時光，倒流到了當下，自殺會令你家人破產、坐牢；企跳係踩紅線，破壞國家形象。家屬要一個說法嗎？那就是：踩紅線！死快啲！