高鐵倒數通車，西九總站已有內地執法人員南下，原來米奇都已經殺入高鐵站，迪士尼樂園已經喺站內租咗個地方開客務中心，高鐵乘客一落車，就有機會見到米奇！
迪士尼傳訊及公共事務副總裁Linda同八方講，新嘅客務中心為預訂咗迪士尼酒店旅客提供check in服務，搭高鐵旅客喺西九落車，隨即就可以辦理入住手續，如果想先到市區遊覽，可以寄存行李送去酒店，否則有專車接送去樂園酒店。
另一跨境基建港珠澳大橋年內都通車，Linda話已規劃專線巴士由大橋人工島到去迪士尼，近日佢頻頻去大灣區多個城市推廣，新產品包括600幾蚊包入場門票加單程交通，一晚酒店加可3次入場門票，最平千幾蚊起，Linda話希望吸引到更多家庭客同後生仔。