民主派前立法會議員譚香文噚日晨早8點已到特首辦門外排隊，準備喺娥特出席行會時遞交請願信，要求政府喺觀塘綫鑽石山站，興建無障礙升降機由地面直達售票大堂，可惜娥特用咗唔夠3秒接信就快閃走人，但當娥特見到同場另一名前立法會議員、工聯會鄧家彪，同該會現任議員麥美娟示威時，娥特就熱情上前同兩人握手，再停步做工聯會「佈景板」，攞住該會要求改善基層醫療嘅請願信合照，驟眼睇似乎真係親疏有別。
點知娥特呢頭配合工聯會做完騷，嗰頭被記者問到點睇工聯會會長吳秋北近日批評法官嘅言論，娥特不點名對吳秋北言論表示「遺憾」，唔知工聯會中人對娥特今朝忽冷忽熱的舉動有乜感受？