冇C朗都搞得掂！禮拜一嘅歐國聯A級第三組賽事，葡萄牙喺基斯坦奴朗拿度（C朗）缺陣下，隊長臂章交到另一老將、今場第101次出戰國際賽嘅比比手上，結果葡軍憑前鋒安達施華一箭定江山，主場以1:0氣走意大利，61年嚟第一次喺正式賽事贏對方。
雖然葡軍喺三年前友賽亦贏過藍衣軍團，但正式賽事就要追溯到1957年嘅世盃外圍賽，當時葡軍大勝3:0，之後就一直冇贏過對方。
C朗扮留祖記練波免役
葡軍今場擺明讓車馬，今夏由皇家馬德里轉去祖雲達斯嘅C朗號稱要提升喺球會狀態而申請免役，但周一俾傳媒影到同索爆女友佐真娜，喺法國南部小鎮聖特羅佩度假，未有隨隊出戰歐國聯。不過，葡軍雖然冇咗C朗，但後防仲有另一位35歲老將比比壓陣，佢之前已經代表過國家隊上陣100場，今場賽前就有儀式表揚佢呢個里程碑，球場亦掛上「比比100」嘅橫額，佢亦領導防線保持不失，幫球隊小勝。
施華破意數據勁
至於入波嘅安達施華，今場踢到48分鐘就幫球隊打破缺口，佢喺禁區攞波後左腳內彎射遠柱得手，上季仲係佢球會隊友嘅意軍門將基安盧基當拿隆馬，撲盡都救唔到。施華上季以3,800萬歐元由波圖轉投AC米蘭，但表現不似預期，意甲上陣24場只攻入可憐嘅兩球；喺今季希古恩來投下，施華就被流放到西甲黑馬西維爾，點知佢大踢爭氣波，西甲「地標」戰對華歷簡奴就中三元，今仗再幫葡軍建功，證明自己唔係水貨。最近，葡軍名宿紐奴高美斯都為佢抱不平，認為AC米蘭唔識用施華。連同今場，施華暫時為國家隊上陣28場入13球，仲要叻過C朗，後者當年為國家隊上陣28場嗰陣，只係入到九球。
另一邊廂，今夏缺席世盃決賽周嘅意大利，搵文仙尼教都冇用，兩場歐國聯仲未贏到，暫時得一分排榜尾。同日D級第三組賽事，科索沃主場以2:0擊敗法羅群島，攞到成軍以嚟第一場正式國際賽勝利。今次係科索沃史上第一次喺自己國土舉行正式賽事，仲要贏波收場，主場球迷當然好興奮喇！