區議會選舉明年11月就開打，各大政黨早已密鑼緊鼓搵新人落區熱身，2015年先成立嘅民主思路亦預備喺出年進軍地區，佢哋噚日就介紹6名新人，分別落戶黃大仙、南區、元朗、屯門、馬鞍山同埋灣仔。不過民主思路召集人湯家驊坦言，6人未必全部會獲推薦參選，需要觀察佢哋地區服務成績再考慮。
湯家驊又同時宣佈喺6區開展社區實驗室地區工作計劃，邀請市民就房屋、教育、環保等議題提出意見，會舉行社區活動，又會透過社交平台宣傳。目前6位社區幹事中，部份人已經對服務地區有諗法，好似上屆區議會曾經喺赤柱同石澳出選嘅姚潔凝，今次預備出戰薄扶林，對手將會係前民主思路嘅司馬文；陳進雄則有意落戶黃大仙龍星選區，挑戰譚香文。
湯家驊：我哋身份好尷尬
至於民主思路會否同泛民或建制協調，湯家驊坦言佢哋身份非常尷尬，「民主派就當我哋係建制，但建制派又當我哋係泛民」，而且民主思路組織非常細，希望可以避過與大黨正面競爭。