立法會唞暑，唔少議員趁空檔外遊，而民主黨立法會議員黃碧雲就入咗廠為隻右眼做手術，家陣變咗做「獨眼龍」。碧雲喺facebook貼咗張相出嚟，右眼被封，另一張則睇到佢「趴低」瞓咗喺病床上。
趕得切康復睇《施政報告》
碧雲同八方講，佢7月時喺理大做視光檢查，發現視網膜嘅黃斑點位置「扯起咗」，內膜穿埋，故要做「黃斑內膜手術」，將啲氣打入眼球，等內膜慢慢癒合，同時佢做埋白內障手術。
碧雲話，手術係全身麻醉，兩項眼手術做咗近兩小時，雖然手術前做足心理準備，但係入到手術室真係驚到震，「我係驚到牙都震埋！」
佢話，麻醉科醫生同佢講，佢初時血壓爆升至180，做完手術就回落至152，但都仲係高，同時要留院一晚，今日可以出院返屋企，但要俯睡幾星期，呢排都係抬唔起頭做人。
佢話，已經向立法會同理工大學請咗一個月假，所以今朝立法會監察西九文化區嘅委員會傾M+博物館，佢都出席唔到。一個月後，啱啱就係特首林鄭月娥公佈《施政報告》，佢話到時應該可以好返睇實份《施政報告》，碧雲又話要多謝佢老公代佢去講課。
李八方