世界盃冠軍法國周日憑結束10場國際賽入球荒嘅前鋒基奧特射入奠勝一球，主場以2:1擊敗荷蘭，喺歐洲國家聯賽A1組中打開勝利之門。呢場波係法國捧咗世界盃後首次返到自家主場作賽，賽後球隊拎出大力神盃，同球迷喺球場內舉行勝利派對仲打成一片，連因傷退隊嘅隊長洛里斯都有現身。
洛里斯高舉大力神盃
呢場波吸引咗近80,000名球迷入場，總統馬克龍都係座上客，一齊分享世盃冠軍嘅喜悅。球證吹完場後，球場嘅燈光即刻轉暗並冒出煙，宣告慶祝派對開始。法國隊由教練迪甘斯帶領教練團進場，之後法國球員亦逐個同迪甘斯擁抱，場面溫馨。一向熱愛開P嘅保羅普巴，就負責搞氣氛整蠱做怪；今場因傷而冇上陣嘅隊長洛里斯都有現身慶祝派對，佢受到球迷熱烈歡迎之餘更負責高舉獎盃。
基奧特入波多過施丹
講番場波，法國開賽14分鐘就由基利安麥巴比射成1:0領先，荷蘭戰至67分鐘由賴恩巴布追成1:1。不過，法國喺74分鐘由基奧特窩利抽射破網，最終以2:1擊敗荷蘭。
講番奠勝功臣基奧特，原來佢入波後，個人喺國家隊嘅入球總數已累積至32球，超越咗名宿施丹成為法國歷來入球第四多嘅球員。喺法國歷史上，比基奧特入波更多嘅三位名宿分別係51球嘅亨利、41球嘅柏天尼同34球嘅查斯古特。
喺比賽中都有入波嘅基利安麥巴比，個人喺18年已經參與咗法國隊共10個入波，係隊中之最。直到目前為止，呢名射手喺今年總共為法國隊貢獻咗八個入波同兩次助攻。