前皇家馬德里主帥施丹話自己好快會再度執教，摩連奴可唔可以穩坐曼聯領隊之位再度成疑。法國名宿施丹今年五月帶領皇馬贏得歐聯三連冠後辭職，一直都冇新工，不過佢近日接受西班牙TVE訪問時，就話自己應該好快會再執教鞭，施丹話︰「係嘅，冇幾耐我將會重返訓練，因為我鍾意訓練，呢樣都係我一直都做緊嘅嘢。」施丹最近成為咗接替摩連奴出任曼聯領隊嘅熱門人選，上月都有報道指，施丹曾經同朋友表示如果摩連奴被炒，佢希望自己可以到奧脫福接任。
另一方面，摩連奴今夏喺球員交易方面就唔係幾如意喇，曼聯喺開季後英超四戰輸咗兩場，盛傳或會遭炒魷嘅摩佬可謂飽受壓力。有傳媒日前聲稱施丹已準備好加盟曼聯，甚至列出佢入主紅魔後希望引入嘅球員，包括卻奧斯、堤亞高艾簡達拿、占士洛迪古斯同埋卡雲尼，以助球隊扭轉形勢。